Beogradi thyen marrëveshjen e Kumanoves: Jemi gati për dërgimin ushtrisë në Kosovë

Kryeministrja serbe, Ana Bërnabiç tha sot se kryeministri i Kosovës Albin Kurti i solli serbët dhe shqiptarët “në cep të luftës” dhe njoftoi se për shkak të kësaj, Beogradi është afër vendimit për të kërkuar kthimin e trupave në Kosovë.

“Çdo ditë shkelet jo vetëm marrëveshja e Brukselit por edhe marrëveshja e Kumanovës. Jemi afër që të kërkojmë kthimin e forcave tona në Kosovë, sepse KFOR-i nuk po e kryen punën e vet. Serbët nuk ndihen të sigurt, dhe janë të kërcënuar si fizikisht ashtu edhe për jetën, përfshirë kopshtet e fëmijëve”, tha Bërnabiqi, raporton agjencia serbe e lajmeve “Beta”.

Ajo shtoi se presidenti i Serbisë, Aleksandar Vuçiç, gjatë ditës do të prezantojë detaje rreth kësaj.

“Është politika e shekujve 18 dhe 19. Ajo ngjall ndjenja dëshpërimi. Jam jashtëzakonisht e shqetësuar dhe ishte e vështirë të flija natën e kaluar”, tha ajo.

Bërnabiçi ka vlerësuar se Kurti nuk po bën asgjë i vetëm, por se ka pasur edhe “ndihmën e partnerëve në BE që nuk po përgjigjen”.

“Në BE nuk reagojnë ndaj asaj që po ndodh, ose reagojnë kur digjet deri në kockë. KFOR-i dhe EULEX-i nuk po e bëjnë punën e tyre, jo vetëm në përputhje me marrëveshjen e Brukselit por edhe me marrëveshjen e Kumanovës. Ata nuk i mbrojnë serbët në Kosovë as në jug e as në veri të lumit Ibër”, tha kryeministrja serbe Ana Bërnabiç.