Izet Shehu: Zjarri
Jam zjarri i zjarrit tim,
Më i hershëm se Prometeu.
Mos më shihni si hutinë!
U ndeza kur u ngjiz dheu.
*
Jam ushtari, që i binte bririt
rrotull zjarreve pagane.
Me Teutën verë kam pirë
Hoqa vallen mes Taulantëve.
*
Ngria dolli me ilirin Bato
Me Suljotët isha tamburxhi
Shpuz’ e flakë nëpër mote,
Gjersa mbërrita këtu tani.
*
Jam zjarr i zjarrit tim
Më i lashti i këtij dheu.
Mos më shihni me habi.
Linda më parë se Orfeu.
*
Jam zjarri i Shqipërisë
Purpuruar brez pas brezi
Mbi këtë tempull kaq të lartë
Bie dhe ngrihem si Anteu!
