SHBA: 10 vjet burg për ruso-amerikanin që ka vepruar si agjent i Rusisë

Alexander Fishenko, pronar i një kompanie në Teksas të Shteteve të Bashkuara, i cili kishte vepruar si agjent për qeverinë e Rusisë dhe ilegalisht në Rusi i kishte eksportuar arritjet më të reja të teknologjisë ushtarake, është dënuar me 10 vjet burg. Një gjykatë federale në Nju Jork mbrëmë vonë ka urdhëruar dënim me burg për Fishenkon, 50 vjeçar, shtetas ruso-amerikan, i cili në muajin shtator të vitit të kaluar e ka pranuar fajësinë për krime përfshirë veprimin si agjent rus. Gjykata, po ashtu, ka urdhëruar që Fishenko t’i kthejë 500 mijë dollarë nga shitja e teknologjisë së ndjeshme në Rusi, në periudhën 2002 – 2012. Pesë persona të tjerë, po ashtu, e kanë pranuar fajësinë lidhur me keqbërjet e kompanisë Arc Electorincs Inc, pronë e Alexander Fishenkos. Tre prej këtyre pesë vetëve janë dënuar, ndërsa dy të tjerë janë në ikje.