Dea Toçi: REFLEKTIM

Këtu dhe tani!

Çdo gjë tjetër është puhizë pranverore

që zhduket para syve më shpejt se vjen,

dallgët e së ardhmes askush s’i ka provuar

ndodh që i kalon e herë në to ngel.

Këtu dhe tani!

E shkuara s’më ngroh

tek sillem përpëlitem t’i gjej ndonjë kuptim,

i kthehem memories dhe veten shpesh e shoh,

hero për shumë fitore herë rob në dështim.

Këtu dhe tani!

Kur jeta më ul këmbëkryq para vetes

unë dhe mendimet në një tavolinë,

i djegim të gjitha vetëm me një shkepëse

mbushem frymëplot, këtu dhe tani!