Ela Zdrava: SHPIRTIT I KE MUNGUAR

 

Mos u zgjo si qiell i rënduar me re,

pesha e tyre ka dhimbjen e së djeshmes,

lëre sot të zbraset mbi tokë ky qiell,

të zgjohesh me diellin e të nesërmes.

 

Mendimet e vrara me tinguj fashoji,

qepenat e shpirtit rrëmbimthi ngriji lart,

dritares zemrës hapja krejt kanatat,

të hyjnë cicërimat me të ngrohtin fllad.

 

Shpirtin e lodhur të ta marrin cicërimat,

drejt kaltërsive të fluturojë i lehtësuar,

majave të maleve të shuajë bubullimat,

e nesërmja të të zgjojë rreze lartësuar.

 

Vatrave të zemrës ndizi zjarre,

me bukuritë e jetës vallëzo dashuruar,

asgjë nga e djeshmja s’të pengon fare,

veç ti, shpirtit tënd shumë i ke munguar.