Mercedes Gega: Herët a vonë

Një ditë gjithsesi

Do të rritesh aq sa do të besosh se dashuria jote mbetet një fëmijë.

Zhveshur lëkurësh e fytyra stinësh.

*

Do të rendësh për pak ujë burimesh premtuar prej saj.

Diellin që lëviz si feniks në gji.

*

Ti si fëmijë do t’ia  tregosh të gjithëve,

I bindur se globin e rrotullon ti me gishtërinjtë e hollë dhe naivë.

*

Herët a vonë,

Një ditë nga këto që do të vijnë,

Do të më kuptosh fëmija im

Përse unë flisja shpesh me plagët e mia

Kur dielli perëndonte jashtë në kopsht…

*

Në kavaletën e natës

Shumicës i mjafton hëna,

Vetëm një të dashuruari me ditën

I mungon dielli i tij.