Krenar Zejno: Algjebër fjale për varg të gjelbër
Algjebër fjale për varg të gjelbër
(kushtuar poetit Frederik Rreshpja)
Ia lë dheut barrën e tokësores Fjala
ngrehjes qielli për në balet të blertë
T’i lutet zotit të vallëzimit të takojë
atë engjëll që i është blatuar për fat
Takimit të flatërt me engjëllin e vet
që mund të ketë dhe shekuj tek pret
fjalën që larton shtat të puthi engjëj
E çdo fjalë veç një engjëll në shtrat
Poezi, ti altar i puthjeve symbylltaz
kur fjalët nën betim i falen engjëllit
E tek i shliron për meshë ajrie poeti
bie peshe dhimbur si fjala e ndarjes
E resht e thellon tokën ku do heshtë
të tumiret me plagët e ngrehet lartie
Për hënë shpengimi barrë e gravitet
e gjer peshë të hirit. Për të mos rënë
O erë të blerte det e qiejsh ajrie eter
gjer ku fati ndjek të nëmurit me art?
A thua përhënet ende vallë një poet
edhe kur frymon përtej, hënës lart?!
Krenar Zejno / nga vëllimi me poezi: ‘Vurrata në flatra-antologji engjëjsh’.
