Sadik Bejko: Në rrethin e trembëdhjetë…

Nën ankth e makth që zgjat,
me peshore në dorë,
ndëshkimi im të ther.
I fitoj të gjithë gjyqet në tribunal.
… të ndëshkuarit,
fajtorët? Ata prapë,
Ata paturpësisht
…fitimtarë.

Dalin,
Bëjnë jetën ata.
Popullojnë majat dhe rrugën.
Më qeshin nga lart, më nxjerrin gjuhën…
I moshuar,
prift i thinjur në kishë,
dhe nga ky tribunal
s’po heq dorë

…një huq i rinisë.

Në tribunalin tim pa pranga,
Pa litarë, xhelatë a burg,
Me tru në erë, peshore në dorë
jap vetëm të drejtë.
Këtu, në tunel,

në rrethin e trembëdhjetë.

Marrë nga libri “Letër Hamurabit” 1979.