Irma Kurti: UNË QAJA PËR TY
Unë qaja për ty. Lot më rridhnin rrëke
mbi kraharor. S’do të t’prekja më, s’do
të të puthja, trupin tënd të imët s’do ta
shtrëngoja në krahët e mi, më jo.
Kush do t’më dhuronte dashuri pafund
si oqean? Kush do t’më bënte të qeshja
me shpirtin hareplot, kush do t’më falte
gëzim në një jetë të pabesë si kjo?
Avulli i kafesë më mbulonte si mjegull,
po ja që gjithçka e shikoja qartë! Fjalët
mbyteshin në atë pellg të errët dhe unë
e pambrojtur ndihesha qysh në atë çast.
Nënë, unë qaja për ty, për jetën tënde
që do të tretej shpejt si rrufe, për atë
dashuri që dot nuk ta dhashë pa kufij,
për ndjenjat e pendimet që si grushta
ma rrihnin gjoksin pa mëshirë. Nëse
do të kisha mundësi të të falja shumë
ditë e vite nga të miat, do t’i nxirrja
që atë moment nga shpirti im që ty të
të kisha pranë edhe ca stinë të tjera e
të të mbështillja ende në një përqafim.
Unë qaja për ty…