Odise Kote: GJËRAT E VOGLA TË THELBIT
Më pëlqen e kuqërremta e gjetheve vjeshtake në pemë,
Po limfa e njëlmtë e lastarit që e ushqen, më tepër.
Dallgët mitike kur shkërmoqen mbi brigje e shkëmbenj
Dhe më shumë gjeratorja ku lind fuqia e errës.
Më shtang ortek – llahtaria që gremiset malit mespërmes,
Kur rrafshon guva, shkurre, pyje, me shpejtësi të vetëtimtë.
E bardha mister që këput, rrëzon, shkatëron si presë,
Topthin nismëtar të dëborës, e qortoj pafundësisht.
Sa i dua përrenjtë që kërcejnë në shkëmb e gêrxh, si sorkadhet.
Dhe futen prehërit të lumenjve në rrymën e thellë.
Vrapojnë si kuaj të hazdisur në detet, oqeanet.
Eh, por më shume unë dua, burimin e heshtur, sekret.
Më djeg kureshtia tek prova e shkretimit, kuqalashe si gaca.
Të jem dëshmues tek e vërteta e rrezikshme, i pari.
Krim e ndëshkim, ligësinë e përvëloftë pa mëshirë flaka,
Sa i dua shkëndijëzat e fërkimit nga dy gurë stralli.
I dua gjërat e thelbit, ato të voglat, hakngrëna.
Sa shumë… në emër të historive të pathëna…