Neviana Shehi: NËNA
Sa herë afron ora
që unë të ik
Nëna ime vendos në fytyrë
një pamje vranësire dhe i arratisen fjalët.
Vete e vjen nëpër shtëpi
dhe nis të fshijë sendet
që i kish fshirë pak më pare.
Shtihet e qetë
por me bisht të syrit
ndjek lëvizjet e pamëshirshme
të orës në mur
vrapin e akrepave
dhe kambanat monotone të kishës përballë.
Ia dëgjoj rënkimet e fshehta
dhe e di se ç’mendon në ato caste.
Sa herë që vjen koha të iki
Nëna rikthehet pas në kohë
dhe nis t’i mallkojë orët
që shpejtojnë kohën
dhe i afrojnë ndarjet…
Please follow and like us: